बैतडी– बैतडीको पञ्चेश्वर गाउँपालिका–४, उज्वलगाउँ स्थित केदार आधारभूत विद्यालयले यस वर्ष सञ्चालन गरेको देउसी–भैलो कार्यक्रमबाट ७२ हजार ३७२ रुपैयाँ आम्दानी गरेको छ ।
विद्यालयले नेपाली मौलिक संस्कृति तथा परम्पराको संरक्षण र प्रवर्द्धन गर्ने उद्देश्यसहित तिहारको अवसरमा देउसी–भैलो कार्यक्रम सञ्चालन गरेको थियो । उक्त कार्यक्रमबाट कुल ७२ हजार ३७२ रुपैयाँ संकलन भएको विद्यालयका प्रधानाध्यापक हिराराम ओडले जानकारी दिए ।
देउसी–भैलो कार्यक्रममार्फत आर्थिक संकलन गर्नुका साथै स्थानीय समुदायसँगको सम्बन्धलाई थप सुमधुर बनाउने र विद्यार्थीमा मौलिक संस्कृति, परम्परा तथा सामाजिक सद्भावप्रतिको भावना विकास गर्ने उद्देश्य रहेको विद्यालयले जनाएको छ ।
विद्यालयले सञ्चालन गरेको कार्यक्रममा सहयोग गर्ने सम्पूर्ण सहयोगदाता, अभिभावक, स्थानीयवासी तथा शुभेच्छुकप्रति धन्यवाद व्यक्त गरेको छ ।