बैतडी । सुदूरपश्चिम सरकारका आन्तरिक मामिला तथा कानुन मन्त्री शिवराज भट्टले सडक स्तरोन्नती गर्दा गुणस्तरमा ध्यान दिन आग्रह गरेका छन। पाटन–पञ्चेश्वर सडकअन्तर्गत मेलौली–पञ्चेश्वर खण्डको अनुगमन गर्ने क्रममा सडक स्तरोन्नती गर्दा गुणस्तरमा ध्यान दिन आग्रह गरेका हुन।
शिवनाथ गाउँपालिकाका विभिन्न स्थानमा पुगेका मन्त्री भट्टलाई स्थानीय नागरिकले ग्रामीण सडक स्तरोन्नतीमा ध्यान दिन आग्रह गरेका हुन् । शिवनाथ गाउँपालिका भारतसंग सीमा जोडिएको पालिका भएकाले महाकाली क्षेत्र सम्म पुग्ने सडकलाई सहज बनाउन स्थानीयहरुले आग्रह गरेका हुन्।
ग्रामीण क्षेत्रमा उत्पादन भएका कृषि सामग्री, नदीजन्य सामग्री ढुवानीका लागि ग्रामीण सडक स्तरोन्नतीमा प्रदेश सरकारको ध्यान जानुपर्नेमा स्थानीयहरुले जोड दिएका छन्। स्थानीयहरुका कुरा सुनेपछि मन्त्री भट्टले प्रदेश सरकारले नागरिकका मागलाई उच्च प्राथमिकतामा राखेको बताए । नागरिकले राखेका माग पूरा गर्न सरकारले सक्दो पहल गर्ने उनले बताए ।
गृह जिल्ला बैतडी पुगेका मन्त्री भट्टलाई पूर्वाधार विकास कार्यालयका तर्फबाट सडक स्तरोन्नतीमा भइरहेको प्रगतिका बिषयमा जानकारी गराएको इन्जिनियर नरेश भुलले बताए। सडक स्तरोन्नतीमा बजेटको अभाव रहेकाले बजेटका लागि आग्रह गरेको उनले बताए ।