अमेरिकी राष्ट्रपति डोनाल्ड ट्रम्पले पूर्व उपराष्ट्रपति कमला ह्यारिसको सिक्रेट सर्भिस अर्थात् गुप्तचर सेवा सुरक्षा खारेज गर्नुभएको छ । ट्रम्पको निर्णयसँगै ह्यारिस अब पर्सि सेप्टेम्बर एक तारिखदेखि गुप्तचर सेवा सुरक्षाविहीन बन्नुहुनेछ ।
ह्यारिसले डेमोक्र्याटिक पार्टीको तर्फबाट ट्रम्पसँग राष्ट्रपतिय चुनावमा समेत प्रतिस्पर्धा गर्नुभएको थियो । गएको जनवरीमा पदभार ग्रहण गरेदेखि नै राष्ट्रपति ट्रम्पले आफ्ना राजनीतिक प्रतिस्पर्धीलाई लक्षित गरी विभिन्न कदम चाल्दै आउनुभएको छ ।
अमेरिकाको सङ्घीय कानूनअनुसार पूर्व राष्ट्रपतिले आजीवन र पूर्व उपराष्ट्रपतिले पदावधी सकिएपछि छ महिनासम्म सिक्रेट सर्भिसको सुरक्षा पाउने व्यवस्था छ । कानुनअनुसार ह्यारिसको पदावधी सकिएको छ महिनापछि सिक्रेट सर्भिस नपाउने भए पनि तत्कालीन राष्ट्रपति जो बाइडेनले आदेश जारी गर्दै ह्यारिसका लागि थप एक वर्ष सिक्रेट सर्भिसको सुरक्षा दिने निर्णय गर्नुभएको थियो ।
जो बाइडेनको आदेशलाई खारेज गर्दै राष्ट्रपति ट्रम्पले ह्यारिसले थप एक वर्ष पाउने सिक्रेट सर्भिस खारेज गरिदिएको बीबीसीले जनाएको छ । तत्कालीन आदेशअनुसार उहाँले सन् २०२६ जुलाई २१ सम्म सिक्रेट सर्भिस पाउनुहुने थियो ।
ह्यारिस पहिलो महिला र पहिलो अप्रवासी महिला उपराष्ट्रपति भइसकेको व्यक्ति हुनाले सुरक्षा चुनौतीतर्फ पनि ध्यान दिनुपर्नेबारेमा केहीले जोड दिँदै आएका खबरमा उल्लेख छ ।