नेपाल पत्रकार महासंघले प्रधानमन्त्री सुशीला कार्कीको प्रधानमन्त्री पदमा भएको नियुक्तिलाई संविधानविपरितको प्रावधान भनेको छ।
महासंघले संविधानविपरित नियुक्त प्रधानमन्त्रीले संसद् विघटनका लागि गरेको सिफारिस सदर गरिनुलाई जनमतको अपमान भएको ठहर गरेको छ।
‘हिजो राष्ट्रपतिबाट संविधानको प्रावधान विपरीत प्रधानमन्त्री नियुक्त गरियो, प्रधानमन्त्रीले मध्यरातमा गरेको प्रतिनिधि सभा विघटन सिफारिस सदर गरियो,’ महासंघका महासचिव रामप्रसाद दाहालद्वारा जारी विज्ञप्तिमा भनिएको छ, ‘यसबाट जनमतको अपमान भएको छ। यो अलोकतान्त्रिक र असंवैधानिक कदमको महासंघ घोर निन्दा र भर्त्सना गर्दछ।’
संविधानविपरितको कदमले लोकतान्त्रिक प्रणाली, संवैधानिक सर्वोच्चता, नागरिक अधिकार, मानव अधिकार, प्रेस तथा अभिव्यक्ति स्वतन्त्रतालगायत संविधानले व्यवस्थित गरेका गणतन्त्र, संघीयता, समावेशिताजस्ता उपलब्धिमा आघात पुग्ने महासंघको भनाइ छ। महासंघले भनेको छ, ‘महासंघ वर्तमान संविधान र यसबाट प्राप्त उपलब्धिको रक्षार्थ दृढतापूर्वक अगाडि बढन सबै पक्षलाई आह्वान गर्दछ।’