बैतडीको मेलौली नगरपालिका–०६ हतरङ्गामा रहेको जगदम्बा माध्यमिक विद्यालयले नयाँ प्रधानाध्यापक पाएको छ। सोही विद्यालयमा कार्यरत शिक्षिका ईन्द्रा पोखरेल नयाँ प्रधानाध्यापकका रूपमा नियुक्त भएको जानकारी निवर्तमान प्रधानाध्यापक गोपाल दत्त भट्टले दिनुभएको छ।
नयाँ जिम्मेवारी सम्हाल्दै प्रधानाध्यापक पोखरेलले विद्यालयको समग्र शैक्षिक गुणस्तर अभिवृद्धि गर्ने, विद्यार्थीमैत्री वातावरण सिर्जना गर्ने र शिक्षण सिकाइ प्रक्रियालाई आधुनिक तथा प्रभावकारी बनाउने प्रतिबद्धता व्यक्त गर्नुभएको छ। उहाँले विद्यालयलाई अनुशासन, गुणस्तर र उपलब्धिको आधारमा अगाडि बढाउँदै नमूना विद्यालयका रूपमा विकास गर्ने लक्ष्य रहेको बताउनुभयो।
प्रधानाध्यापक पोखरेलले शिक्षक, अभिभावक, विद्यार्थी तथा स्थानीय समुदायबीच सहकार्य र समन्वय बढाउँदै विद्यालयको भौतिक तथा शैक्षिक विकासमा विशेष ध्यान दिने बताउनुभयो। साथै, सूचना प्रविधिको प्रयोगलाई बढावा दिँदै डिजिटल शिक्षालाई प्राथमिकतामा राख्ने योजना रहेको उहाँको भनाइ छ।
निवर्तमान प्रधानाध्यापक भट्टले आफ्नो कार्यकालमा प्राप्त उपलब्धिहरूलाई निरन्तरता दिँदै नयाँ नेतृत्वले विद्यालयलाई अझ उचाइमा पुर्याउने विश्वास व्यक्त गर्नुभयो। उहाँले नयाँ प्रधानाध्यापकलाई सफल कार्यकालको शुभकामना समेत दिनुभएको छ।
स्थानीय अभिभावक तथा सरोकारवालाहरूले पनि नयाँ नेतृत्वबाट विद्यालयमा सकारात्मक परिवर्तन आउने अपेक्षा गरेका छन्। विद्यालय प्रशासनले आगामी दिनमा विभिन्न शैक्षिक कार्यक्रम, अतिरिक्त क्रियाकलाप तथा पूर्वाधार विकासका योजनाहरू अघि बढाउने जनाएको छ।